من أكون … للشاعر سعيد عزب
بقلم الشاعر .. سعيد عزب
لا تسألنى …..من أنا
أنا الحاضر …..أنا الان …..وكل زمان
انا الماضى….. الذى كان
انا الصحرا ….انا الخضره
انا الوطن ….والنيل
انا التوراه ….والانجيل …..
انا القرآن…..
انا كل اللى جاى….. بكره
بيزرع ورده فى …..قلوبنا
ويرسم بسمه ……على خدودنا
انا دعوه فرح …..لفرح بلدى
تلم الاهل ……..والصحبه
وطبله وطار …..
مع المزمار…..
ترقص كل حبايبنا
وأصحابنا ولاد الجار
انا لو يوم اقول ….الآه
تلاقى اللمه …..حواليه
تروح الامى فى …….ثانيه
وف لحظه اقوم …..زنهار
انا التكشيره….. ف وقت الجد
انا الضحكه …….لآخر حد
انا النجمه ف …….اعاليها
تزين كل …….لياليها
انا البدر اللى كان سهران ……مع الصحبه
يلاغى الكل ويرويله……. حكاياته
انا احمس ……انا مينا
انا ابن العاص ……انا ناصر
انا الجندى اللى……… حرر بلاد سينا
انا اللى باعمل الفوضى …..لكن بنظام
ولوعملت يوم ثوره تكون ……..بسلام
انا اللى دهنت الهوى ……دوكو
سبع الوان …..
انا اللى بنيت ……سكنى من الرمله
على الشطآن ……
وانا اللى بنيت قبرى…….
ف الصحرا ……من الصوان
انا الفلاح …..ا
نا الصانع……
انا الباشا…..
انا الاسطى ……والفنان
انا اللى زرعت ……فوق ارضى
اعمده ……وخرسان
انا الباشا اللى ……افترى ف اهله
وقال دا امان …..
واما الاسطى ……والفنان
ف دى قصه ……..بلا عنوان
انا المصرى ……بسبع ترواح
ف ساحه الحرب
باكون مغوار
لاسد منعنى ……عن عدو
ولا اسوار …..
ولما احكم……. انا الفرعون
باحكم بالحديد ……..والنار
ومن غير مالعب …..أجيب الجون
وبعد دا كله …..بتسألنى …..أكون انا مين
انا المصرى …..انا المصرى …..انا المصرى
ماليش عنوان.. فى كل مكان تلاقينى
انا العنوان ..
التعليقات مغلقة الان