مفارق طرق

ياخوفي يطول التوهان
ونيلنا يقسموه يا سودان
ونتوزع علي لبنان
يجيلنا الداء نتفتت ونتشتت
ونبقي عراق
نتوه مع توهه التايهين
ياسوريا لإمتي موكوسه
وتونس ضايعه من سوسه
حتخرب تخلص المغرب
نتصرب ونتسرسب وتتغرب
ومبكي القدس يافلسطين
يبكي وم الدموع نشرب
ماهو الفاجربناسه عادي بيتاجر
جزاير رايحه بس لمين؟
يقولوا بكره تبقي احسن وحتعافر
وبكره يقولوا بكره فين؟
تضيع عمان مع الأردن
تروح اوطانا بسهوله
ياعروبتنا يا جيبوتي كده تموتي
لاقولتي ولا انتي في الدنيا
بتشكي الجوع لموريتنيا؟
ماتشكي من حاجات تانيه
مفيش بالعربي ياعربي
في اوطانك خلاص وطن
كسروا اليمن
و إحنا دافعين الثمن
ياحسره علي آخر زمن
وإزاى يابكره تنضمن ؟
ولالنا بيت خلاص ياكويت
وتاه الحال وشفنا صومال
وحالها مال
وغمه وغارقه بين بحرين
قطر… بيقطع الملاين قوليلنا
انتي حقيتك فين
معانا ولا للملاعين
نصهين ولا نتصهين وأمر كان
بإيدنا زمان
بالعربي في يدالغربي دالوقتى
بقي في ادين علول خوجات
وفي التوهان
وسايبينهم ليه يا إخوانا؟
علي هواهم علي كيفهم
لو احنا وافقنا بمساومات
حنبقي فتات
ولا حيبان لنا أمارات
ياسعوديه يا بيت الكعبه
ليه سايبه ياليبيا بصي لبهيه
وشوفي الام رايحه فين
وبنهاتي ولا سامعين
كإن في ودننا هرمين
في ناس تسليحها طياره
وناس بالطوبه بحجاره
ودا اللي كان بقلب جرئ
وتاه في طريق
وبان خوفوا في ناس ساكته
كده علي طول
بتسمع في سكات ابو الهول ؟
ياأمه عيسي ومحمد
ايمانها في أوله اجمد
في يوم ماجالها حس رسول
ودالوقتي ولا عاملين
بدين ولافرض ولاسنه
وذنقه في طريق مسدود
من الجنبين نروح علي فين؟
وناس عاميه وبصه لفوق
وعامله مفتحه بتشوف
بتزرع في سمانيلنا بكل هدوء
قنابل تملي عين الشمس
وامتي نفوق ؟
فتيل سطح القمرمرشوق
وبكره منه ياما ندوق
خلاص يعني مفيش مبدأ
ياعربي اصحي بقي فووق
بقينا بإدينا
نتجزأ ونتخوزأ
وضاع الحق
وقالوا ع العدل معوج
عشان معدول
ومش عاوز يكون مع دول
وعاوزينه يكون معوج
عشان يظهر لهم معدول
وحقي راح ومش حالحق
ومالي في حقوقي حق
عشان خايف اقول يوم لأ
مفيش ليا في حقي حقوق٠
مفيش ليا في حقي حقوق ٠