“مركز سبوت” براس غارب يشرح كيفية تعود الاطفال يحدث ويسمع انجلش

بقلم : أ / ولاء سعيد عودة
مدربة كورسات أطفال بمركز سبوت للغات

أزاى تعود طفلك يسمع و يتكلم أنجلش كويس:

1-من الافضل أنك تبدأ تمارس الانجلش مع طفلك من سن 3 سنوات ع الاقل

2-الحضانة مش كفاية فى السن ده البيت كمان له دور أهم

3-أستخدم دايما الصور و الاجسام و النماذج و اللعب المادية الملموسة اللى على شكل حيوانات و طيور و فواكه و خضروات و ابدأ انطقها لطفلك بالعربى و بعدين بالانجلش لو قدرت تخليه يكتب كمان هيكون شئ ممتاز بس ياريت منضغطش عليه فى النقطة دى خصوصا لو سنه صغير و لسه مبيعرفش يمسك القلم

4-خلى الانجلش دايما عبارة عن نشاط يومى و حاول تنطق الكلمات فى البيت بشكل عشوائى بطريقة تلفت انتباه طفلك بحيث يسألك هو عنها و عن معناها

5-دخل اللعب دايما وقت الكورس او المذاكرة ( يعنى مارس الكلمات و انت بتلعب معاه كورة او بالبلون او اى لعبة هو بيحبها ، حاول تفكره بالكلمات اللى اتعلمها قبل كده عن طريق اللعب و حاول تبتكر فى الالعاب و تغيرها على قد ما تقدر بس لازم ميحصلش تشتيت انتباه ويكون فيه توازن بين اللعب و المذاكرة

6-الاطفال كلهم بيحبوا الكرتون حاول تعوده يتفرج على الكرتون الأنجلش وخلى صوت التلفزيون عالى شوية عشان يسمع الكلام بطريقة تلقائية. الكرتون بيقدم لغة سهلة و بسيطة و بيركز على كلمات الاطفال , و حاول بقى تختارله كام كلمة يركز عليهم ومتنساش هيبقى فيه فرق لما يسمع النطق منك و انه يسمعه من حد تانى بيتكلم اللغة نفسها بطريقة أحترافية

7-أستخدم أغانى الاطفال الانجلش اللى يقدر يحفظها الطفل بسرعة بيكون فيها ايقاع يرقص عليه و يتحرك استغل ده فى انك تعرفه معانى الكلمات بالعربى و بكده يكون اتعلم حاجات جديدة بالنطق و الغناء و الحركة

8– و أخيرا حاول تعوده على سلوكيات معينة جوة البيت يكون بيعملها كل يوم عشان تقوى المحادثة عنده زى مثلا water, please – stand up – sit down open your book – eat your food