كحك العيد بطريقتين من اكلات طمطم

اكلات طمطم

كعك العيد لية طريقتين طريقة بنقدح السمنة ونستخدم خميرة وطريقة مش بنقدح السمنة ومش بنستخدم خميرة انا هنزل الطريقتين والفرق هاوضحة الصورة اللى قدامكوا دى للكعك اللى بخميرة وسمنة مقدوحة والصورة اللى بعدها هاتكون كعك من غير خميرة وبسمنة غير مقدوحة

اولا الكعك بالخميرة والسمنة المقدوحة :

هاتجيبى كيلو دقيق / ونص كيلو سمنة/ وكوب لبن /وقطعة خميرة فى حجم عين الجمل/ملعقة كبيرة ريحة الكعك /وملعقة صغيرة ملح /وملعقة كبيرة سكر/ وملعقة سمسم كبيرة غير محمص بصى بقى هاتنخلى الدقيق مع الملح وتحطية فى حاجة غويطة وتعملى حفرة فى النص وتكونى قبلها مدفية اللبن وتحطى معاه ملعقة السكر والخميرة ودوبيهم وغطيهم علشان يخمروا ربع ساعة المهم تسخنى السمنة عالنار وبعدين تحطى السمسم فى وسط الدقيق وتنزلى بالسمنة وهى سخنة وقلبى بملعقة علشان ايدك مش تتلسع وبعدين اعجنى بايدك شوية لحد ما الدقيق يشرب السمنة وانزلى بقى باللبن مع الخميرة واعجنى كويس اوى وبعد ما تعجنى غطيها ساعة تخمر وبعد كدة قطعيها واحشيها او من غير حشو شكليها بقوالب الكعك ورصيها فى صوانى وغطى الصوانى نص ساعة تخمر كمان وعالفرن 180 فى الرف فى النص لحد ما تستوى وبالف هنا وشفا

——————————————————————————————————–

 

كعك العيد من غير خميرة ولا سمنة مقدوحة دة بيبقى شكلة
المقادير :
كيلو دقيق
نص كيلو سمنة سائحة
ملعقة كبيرة سكر
ملعقة كبيرة ريحة كحك من عند العطار
باكو بيكنج باودر
كوب لبن

الطريقة اول حاجة انك هتقلبى الدقيق مع البيكنج بودر مع السكر مع ريحة الكحك كويس وبعدين تنزلى بالسمنة السايحة وتعجنى وتشوفى لو احتاجت سائل تحطى من اللبن محتاجتش خلاص لان الدقيق بيختلف من نوع لنوع لو احتاجت تحطى من كوب اللبن اللى فى المقادير وبعد العجن هاتسيبيها ترتاح ربع ساعة متغطية وبعد كدة نعملها كور ونضعها فوق صاج او صينية مدهونة سمنة وممكن نشكلها بمنقاش او لو عندك بصامة الكحك تضغطى ضغطة بسيطة وبعدين هانسيبها متغطية ترتاح نص ساعة بس وبعدين على فرن متوسط الحرارة لمدة 25 دقيقة وتطلعيها تبرد تزينية بالسكر البودر
كدة ليكوا مطلق الحرية تعملوا اى نوع كعك انتوا بتحبوة انا عن نفسى بعمل الاتنين