كب كيك الكنافه بالقشطه والمانجه ع طريقة بوبوس

اكلات بوبوس

كب كيك الكنافه بالقشطه والمانجه ع طريقه بوبوس
نص كيلو كنافه
3معالق سمنه بلدى
نص كوب سكر بودرة
قشطه
مانجه
الشربات
2كوب مايه
كوب ونص سكر
رشه فانيلييا
نص ليمونه
قلب المانجه ما نرمهوش نحطه مع الشربات واحنا بنعمله ودوقى احلى شربات بالمانجه ودى تكه من تكاااااااااااتى

هنا طبعا كنت حاطه الكنافه ف الفريزر وطلعتها فرفتها بكل سهوله وقلبت معاها السكر البودرة والسمنه البلدى وقلبتهم مع بعض كويس جدا وبعدين جبت صنيه الكب كيك وفرشت فيها الورق الخاص بالكب كيك ولو مش موجود ندهنها سمنه وبعدين حطيت طبقه من الكنافه ف كل عين من الصنيه وحولت اعملها جوانب ونضغط عليها كويس اوى زى ما انتو شايفين

وهنا حطيت معلقه صغيره من القشطه بس خلى بالك مش نحط ع الاطراف ف النص بس زى ما انتو شايفين

وهنا غطتيتها بطبقه تانيه من الكنافه ونضغط كويس بس بالراحه وندخلها فرن ساخن ع الشبكه ف النص لحد ما وشها يحمر

وهنا بعد ما طلعتها من الفرن و نزلتها ف الشربات الساقع مهم اوى تكون سخنه والشربات ساقع اوى ونغطيها ودى تكه من تكاتى عشان تفضل طريه نغطيها شويه وهى سخنه وبعدين زوقتها بالقشطه والمانجه زى ما شوفتوا ف اول صورة بس ما اقولكوش روعه

بالف هنا اكلات بوبوس