قطر ” ألف خيرك

بقلم- خالد متولي

أموت وأعرف هو كل واحد عنده عشة ع الخليج يسميها دولة ؟! ماشى ياعم مش مشكلة أهو ربنا بيبارك ف القليل برضه وبعدين يعنى الضئالة المتناهية للعشة دى برضه ليها مميزات كتير قوى يعنى مثلا مستحيل تلاقى عندهم أزمة طاقة ، يادوب حجارة قلم من الصغيرة تكفيهم سنة بحالها والمواصلات عندهم سهلة جدا لدرجة أنك مش محتاج تركب مواصلات ، ده يادوب تنزل من بيتك وتقف ع الرصيف وتنط نطة صغيرة تلاقى نفسك وصلت الحتة الى أنت رايحها بس لو ما أخدتش بالك وأنت بتنط حاتدخل نفسك ف مشاكل كتير زى الأخ الى كان عايز يروح شغله ونط بس النطة جت واسعة حبتين لقى نفسه واقف وحواليه عساكر وجيش كتير قابضين عليه وبيسألوه عن جواز السفر بتاعه فطلع لهم بطاقته استغربوا وقالوا له دى تستعملها ف قطر أنت هنا ف البحرين !!! وبعدين يعنى قطر برضه مهما كان هى عشة عربية برضه وبتفيد باقى الدول العربية خصوصا فى تصدير الموز لدرجة أن أفخر ” موزة ” من عندهم وبعدين قطر برضه راعية الدول العربية وهى الكبيرة وهى المتقدمة وهى اللى حاربت أسرائيل فى أكتوبر ولولاها لكانت مصر مازالت تحت الأحتلال الأسرائيلى وسيناء كانت مارحعتش ده على أساس أنها راحت مشوار واتأخرت وهى بابا وهى ماما وهى أنور وجدى . مش أنا اللى بقول والله دول هما اللى بيقولوا كده أنا مالى ولا مؤاخذة ، عموما عندنا ف مستشفى الأمراض العقلية جناح محجوز بحاله ليهم لو يحبوا يشرفوا فى أى وقت أحنا جاهزين واحب اطمنهم أن الجناح ده حايكفيهم ويفيض ده بيشيل يجى 50 فرد بحالهم . وطبعا قطر زى ما أنتوا عارفين عندها أكبر قناة فضائية فى العالم لدرجة أن مساحة القناة أكبر من مساحة قطر بثلاث أو أربع مرات غير الفكة وأن عدد اللى شغالين فيها أكبر من تعداد سكان قطر !!!

ملحوظة : أكيد ده السبب اللى مخليها مركزة على مصر بالذات لأن أخبار قطر كلها كفاية عليها سطرين فى أى ورقة) وعموما ” قطر ” ألف خيرهم أهم بيسلونا برضه !!