** قدرى **

بقلم الكاتب والشاعر ناجى أنس /

قدرى
لو كنت أعرف أن انا قدرى
هيخطف نظرى
ما كنتش اغمض لحظة وانام
لو كنت أعرف
ان انا قدرى هيخطف
نظرى ما كنتش اغمض لحظة وانام
واحرم عينى من ان انى اشوفك
فى حقيقتى مش ف الاحلام
وانا دلوقتى فيا مشاعر بتحسسنى
أن انا شاعر ماتت جواه أحلى مشاعر
لما باحس بانك جنبى
مستنى انى اسمع صوتك
ما انا من غير ما اسمع لك
صعب احسك
كنت زمان من نظرة عين لعيونك
باقدر اعيش واحضن قلبك
بعيونى الاتنين
واغطيكى واقعد ألملم فيكى بالرمشين
وانا دلوقتى رحت وتهت اكمنى
حاسس بسحابة ع الننى
مابقيتش تريحينى
ولا تطمنى بتجرحنى
وبتقتلنى وبتدبحنى
إحساس كسر فى مشاعرى الإحساس
ما انا ملهوف
اكتر حاجة باشوفها الضلمة
صبحت هى مدد الشوف
ليه الواحد ما بيعرفش
قيمة الحاجة إلا اما بتخلص
وتروح ويحس من غيرها بخوف
نفسى ارجع من تانى
او ينعاد لى زمانى ثوانى
وأقدر اشوف
عارفة ساعتها انا هاعمل ايه ؟
فى العينتين
اللى سابونى من غير عين
تقدر تلمح سحر عيونك
لازم اتحايل ع الرمشين
واقنع رمشى الفوقانى
انه يخاصم رمشى التانى
ما يقابلوش
علشان يفضل منى اخدنى
ليكى وجايبك ليا
ف حضن عنيا
بس قدرنا ازاى هنعانده
وهو نصيبنا اللى يصيبنا
وجاى من عنده
بيفكرنا بربنا وحده
اللى خالقنا وكلنا عبده
وانا دلوقتى عندى ايمان
واطمئنان انه بيفكرنا
ياناس بعظمته
وانا جوايا عندى قناعة
من جوايا ان جراحى فيها دوايا
يمكن هو ادانى كتير
خلانى على مر زمانى
شوفت جمالك سحر وصالك
وانتى قصادى قلبى قالى
أن انا كنت زمان وانا شايف
سحرك وانتى فى قربك
منى كانت لحظة فى حتة نظرة
تساوى عمر بحاله
واكتر يمكن مليون مرة
رغم ده كله باكدب قلبى
واقوله انا ما شبعتش منك
هاشبع يمكن أو اطمن
لو يرجع لى نظرى الغايب
وألمح صورتك بعيونى
وبقلبى وما اسيبش ولا دقة
ف نبضة مش ضماكى
عاوز أحس بجزء صغير
من حتى حتة لحظة
املى فيها عيونى منك
بعدها مش فارق ويايا
انى اشوفك تانى بس اكون
طمنت القلب الحاير
وحفرتك صورة جواه
ورسمتك ف هواه
وانا متأكد انك يا الهى ارحم
على ناس عبدك وبمقدرتك
قادر انك تشفع لى
قادر انك تشفع لى
أشد الحيل
وأبقى عليل
وانا مش عليل