عقر المنطق الأنثوى

بقلم : ندى الطنانى

اول حاجه بتتحدد بيها شطاره البنت…انها تتخطب او تتجوز و سنها صغير عشان لما تيجى تخلف تفضل صغيره برضه…مع ان اصلا تعب الخلفه و البيت هيخلوا شكلها اكبر من سنها ! بس ماااشى ماعلينا !! البنت تبقى محترمه لو مالهاش اى صداقات شباب غير كده يبقى مش محترمه و مش متربيه !! و “مش هتلاقى اللى يتجوزها” البنت تبقى محترمه لما تبقى محجبه غير كده تبقى غير اخلاقيه بالمره !! “و مش هتلاقى اللى يتجوزها” البنت لما تعدى سن ال 23 او 25 اقصى حاجه و لسه متخطبتش…يبقى عنست..ليه بقى عنست ؟ عشان مافيش حد عايز يقبلها عشان سنها كبير و عشان تلاقى او بيقولو ان اخلاقها مش كويسه..و بيقولوا ان مشيها بطال و بيقولوا ان كل م حد يتقدملها يمشى و مايجيش تانى….طب هما مين دول اللى بيقولوا حضرتك يعنى …. طبعا الرد صمت مع رفعة الحاجب و لوى الشفايف و قلبها كاستغراب !! البنت لما تتخطب لازم تقطع علاقتها ب اى حد خطيبها مابيحبوش و تقطع صداقتها اللى بقالها كذا سنه ب اى حد خطيبها مابيرتاحلوش !! او عشان خطيبها عايز كده…و لو معملتش كده يبقى بتخونه و مش بتسمع الكلام و دايره على حل شعرها و يشتكيها لاهلها و و !!! “و مش هتلاقى اللى يتجوزها” البنت لازم تقول الرأى اللى الكل موافق عليه…و لو قالت رايها الحر المستقل يبقى هى غلط و هما اللى صح…خاصة لو الاهل يعنى ..بحجه احنا عارفين الناس بتفكر ازاى… طب احنا مالنا و مال الناس ؟! السؤال ده ف حد ذاته غلط بالنسبالهم و بناء عليه يبقى التفكير كله غلط !!” و مش هتلاقى اللى يتجوزها” البنت لو اصرت على رايها و تمسكت بيه عشان بكل بساطه هى مقتنعه باللى بتعمله عشان من حقها زى اى حد…يبقى هى لسانها طويل و دماغها ناشفه و مابتعرفش تتفاهم و مابتسمعش غير رايها و بس ..فى حين انها بتقول مش عشان انا ضدكم يبقى انا غلط !! ..بس تقريبا محدش عارف مين بالظبط اللى دماغه ناشفه ..و محدش هايرضى يتجوزها برضه ! البنت اول ماتبدا تتكلم كده لحد م تكبر بتتربى على مقولة “اخرك ف بيت جوزك” يعنى هدم لاى طموح و بناء التفكير كله على ان البنت لازم تتجوز و انها مش هاتروح ف حته منه و ده اخرها…مع انه مش اخرها..المفروض يكون ده بداية لحياه جديده هى تبداها بالمعنى اللى بتتمناه…مش اللى المجتمع مرتبه للفكره نفسها !! البنت مطلوب منها انها تلبس “عشان المجتمع و كلام الناس” تتجوز”عشان المجتمع و كلام الناس” تخرس”عشان المجتمع و كلام الناس” تنكسر “عشان المجتمع و كلام الناس” توطى راسها و تسمع الكلام و تحفظ ان اخرها بيت جوزها و تكبت ارائها و حريتها “عشان المجتمع و كلام الناس” البنت من الاخر مطلوب انها تموت و هى عايشه… !!! مش معنى ان المجتمع مرتب حاجه..يبقى احنا ننساق تحتها..و مش معنى ان المجتمع مريض يبقى احنا نسايره ف مرضه و نخاف منه…المواجهه حلوه ! الناس و المجتمع مش هايفرحوا ل فرحنا و لا هايزعلو لزعلنا ولا هايفرحوا لنجاحنا و لا هايفرحوا لخطوبتنا و جوازنا برضه !! الناس مريضه بالكلام و التدخل ف حياة الناس..هاتفرح هاتحزن هاتنجح هاتتجوز هاتخلف…هاينتقدوك و هايطلعو فيك القطط الفطسانه او هايحسدوك…!! اه مش عايشين لوحدنا..بس عقلنا ملكنا لوحدنا.. اه عايشين ف مجتمع شرقى “مريض” بس عقلنا مش مريض عشان ننساق بالمنظر ده ! و مش معنى ان غيرنا رايه مختلف عننا يبقى احنا صح و هما غلط او العكس !! ثقافة الاختلاف ده اهم شئ هايميز عقلك و شخصيتك ! عيشى عشان نفسك و عشان تبنى شخصيتك المستقله…مش عشان تساعدى شخصيتك على البرمجه المجتمعيه المريضه !! عيشى عشان كيانك اللى هاييجى واحد يحترمه قبل اى حاجه تانيه فيكى…و ماتقبليش ب اى حد يقمع و يكبت كيانك و حريتك لمجرد انك انثى و يتحكم ف معرفتك ب اصدقائك اللى عماله تبنى فيهم و تحافظى عليهم لمجرد انه راجل و لازم تسمعى كلامه…!! دورى على كيانك و حافظى عليه هتلاقى اللى يحافظ عليه معاكى بس باليقين و الوقت المناسب ليه !!