طريقة عمل الفينو والكيزر

 

اكلات طمطم

المقادير :
نص كيلو دقيق (انا الكمية دى عملاها بربع كيلو مش نص كيلو )
ملعقة ونص كبيرة خميرة
بيضة
ملعقة كبيرة خل بديلة لمحسن الخبز
3 ملاعق سكر
ملعقة صغيرة ملح
ماء دافى للعجن
5 ملاعق كبار لبن بودر
نص كوب زيت

انا اول حاجة بعملها بحط الخميرة مع شوية مية دافية ومع السكر واقلبهم كل دة فى كوب واغطيهم واسيبهم ربع ساعة علشان الخميرة تتفاعل وضعت الدقيق واللبن البودر والملح والسكر وقلبتة وبعدين نزلت بالخميرة والبيضة والخل وعجنت كويس اوى فى الكيتشن ماشيين ونزلت بالخل وبالزيت وكل اما تحتاج مية انزل شوية شوية والماء يكون دافى مش بارد لااااااااااااااازم العجينة تتعجن كويس اوى علشان تعمل عرق وتبقى ناااااااااعمة غير كدة هاتبقى مكبوسة وتقيلة كل اما تتعجن كتير تبقى احلى واهى قدامكوا ناعمة

هنا قطعتها على طول انا هنا هاعمل 2 كيزر جامبو و2 فينوا عادى

هانلفها زى السويسرول هانلفها رول ونخلى الطرف تحت فى الصينية

 هنا وضعتهم فى الصينية مدهونة زيت وبعيد عن بعض علشان هاتخمر هاغطيهم بكيس واحطهم في مكان دافي وتخليها تخمر ااقل حاجة 3 ساعات ولو قعدتى 4 ساعات يبقى افضل هاتديكى نتيجة حلو

هنا بقى فى خطوة عملتها علشان الفينو يبقى زى بتاع برة ومينشفش حطيت فى الفرن طبق بايركس مليان مية سخنة وسيبتة فى الفرن وانا بسوى الفينو علشان البخار يوزع الهوا فى الفرن والفينو يستوى كويس اوى انا عملاه فى الفرن الكهربا هاتعملوة برضوا فى الفرن العادى ممكن تحطوا اى صينية فيها مية سخنة

هنا اختمرت هادهنا لبن فقط كويس بالفرشة واضع سمسم او سمسم وحبة البركة والفرن يكون على 200 هاحطها فى الرف السلك فى النص عشر دقايق وبعدين اوطى النار 180 واسيبها تستوى وتحمر ولما تستوى اطفى النار واسيبها فى الفرن 5 دقايق واطلعها على طول وهى سخنة على سرفيس واغطيهم بكيس ادخل السرفيس جوا كيس واقفلهم علشان تتطرى

وادى النتيجة انا عملاه جامبو علشان هامعل برجر زى بتاع هارديز