حكايات داعش ودعشوشة !!
بقلم : خالد متولــى
انتفض داعش من نومه فزعا أثر سماعه صوت دقات الساعة معلنة عن السابعة صباحا بأغنية مافيش حاجة تيجى كده لنانسى عجرم ، ونظر فى اتجاه الطاولة التى بجانب سريره يبحث عن مصدر ذلك الصوت المريب ، وتسمرت عيناه حين لمحت تلك الزنديقة ببندولها المتراقص كوسط أمهر الراقصات ، فنظر إليها بتساؤل يعصفه الرعب
داعش : أعوذ بالله أعوذ بالله ، ماهذا العفريت ؟!
( دعشوشة استيقظت من نومها على صراخه متثائبة )
دعشوشة : عفريت أيه كفا الله الشر ياسى داعش ؟
داعش : أيه البتاعة اللى بتتكلم دى ( يشير للساعة بحذر وخوف ورأسه يكاد يختبىء أسفل الوسادة وينظر إليها بطرف عينه )
دعشوشة: ( بدهشة ) بتاعة أيه اللى بتتكلم ؟ دى الساعة ؟
داعش : ( برعب وتساؤل ) الساعة ؟ أنهى ساعة ؟ هى الساعة قامت ؟
دعشوشة : ساعة أيه اللى قامت ؟! دى منبه
داعش : منبه أزاى يعنى ؟
دعشوشة : منبه علشان يصحينا من النوم
داعش : ( باستغراب ) مزولة يعنى ؟؟!!
( يمسكها من شعرها بعنف ) والله لقطع راسك يابت الكلب يافاجرة مين اللى جاب السخامة دى هنا ؟
دعشوشة : ( برعب ) والله ما أنا ياسى داعش ده الواد دعيش ابنك هو اللى جابها أمبارح
داعش : دعيش ؟؟!!! أزاى يعمل كده ،والله لقطع راسه ابن الكلب ده ، جايب لى مزولة من بتوع الفرنجة ، لأ وفين ؟ فى أوضة نومى
دعشوشة : فرنجة أيه ؟ لأ ، دى كانت بتاعة الشيخ أحمد جارنا ،خدها منه بعد ما دبحه أمبارح وقطع راسه .
داعش : ( تهللت أساريره ) قطع راسه ؟! ياااااه هو الواد كبر للدرجة دى ؟!
دعشوشة : أمال أيه ؟ ده كبر وبقى شحط زى ابوه قد الدنيا
( ينتفخ داعش زهوا بنفسه وبأبنه )
داعش : خلاص يبقى نجوزه ،وندرا عليا لأعمله فرح ما اتعملش لحد قبله وادبح له يجى 100 راجل وحرمة من جيرانا
دعشوشة : طول عمرك أبو الكرم يا حاج ، بس لما ندبح جيرانا مين اللى حايحضر الفرح ؟
داعش : ما أنا حا ادبحهم بعد الفرح ياجاموسة
دعشوشة: ( تهز رأسها علامة الأستيعاب والفهم وتنطق بصوت أشبه بصوت الجاموسة ) عاااااا فهمت
التعليقات مغلقة الان