أنت فاكر نفسك فى نيويورك فى ديسمبر 20, 2013 شارك بقلم -خالد متولي بعد يوم متعب قررت أروح أرتاح وأنام .. وطول السكة بحلم بسريرى الجميل والمخدات ومعشم نفسى أكمل الحلم بتاع امبارح اللى الست أم محمود جارتى الله ينتقم منها بوظته عليا بصريخها اللى ما بيبطلش ملحوظة هامة : مش عاف حاتفيدكم ولا لأ ( الصريخ ده هوايتها الوحيدة ، فرحانة تصرخ زعلانة تصرخ جعانة شبعانة أى مصيبة تولع فيها وف اللى جابوها بتصرخ برضه ) المهم وصلت البيت ولسه يادوب داخل العمارة لقيت الجيران كلهم واقفين عند المدخل – خير ياجماعة متجمعين عند النبى ؟؟!!! – شد حيلك يا اخويا – اشد حيلى ؟ أنا عايش لوحدى وماليش حد يكون مات .. ( نهار أسود لأكون أنا اللى مت وأنا مش واخد بالى ) مين اللى مات ياجماعة ؟ – ماتقلقش يا أستاذ الموضوع مافيهوش موت خالص – أمال أيه ؟ – بسيطة ماتقلقش … شقتك أتسرقت بس . – والسرير .. أتسرق برضه ؟ – أنت كل همك ع السرير ؟ – أه ماهى الشقة مافيهاش حاجة غير السرير وكنبة بايظة ياريت يكونوا سرقوها أهم يوفروا عليا شيلها وتنزيلها لكن السرير أنا عايز أنام دلوقت .. أنام ع الأرض يعنى ؟ المهم طلعنا نبص ع الشقة ونشوف الحرامى الخايب اللى جاى يسرق شقة فاضية !! فجأة الواد حسين أبن جارتنا اللى بتصرخ لقيته داخل أوضة النوم وبيمسك السرير زعقت له جامد – ما تمسكش أى حاجة بأيدك علشان البصمات ههههههههههههههههههههههههههههههههههههههههههه – بيضحكوا ليه الهبل دول – بصمات أيه يا استاذ .. أنت فاكر نفسك فى نيويورك ؟ – يعنى أيه ؟ – هو انت متخيل أن البوليس ممكن يجى ؟ – طبعا مش شقة أتسرقت ؟ – أبقى قابلنى المهم طلبت البوليس وعدت ساعة والتانية ومافيش حد عبرنى شكل الجدع المتخلف بتاع نيويورك ده كلامه حقيقى … المهم كلمت واحد زميلى ف الشغل ابن عمه شاويش قد الدنيا يكلملى حد من بتوع القسم يعبرنى ولا حاجة وفعلا بعد ساعة لقيت عسكرى جاى فرحت أوى وبصيت للجدع بتاع نيويورك لقيته متنح ومذهول ، أنا حسيت أنى عملت معجزة أنى خليت البوليس يجى حتى لو كان عسكرى وبينى وبينكوا يعنى أنشكحت أوى العسكرى : أنت صاحب الشقة ؟ – أيوه ؟ – أيه اللى أتسرق ؟ – ولا حاجة – ولاحاجة أزاى ؟! – الشقة كانت فاضية أصلا مافيهاش غير سرير وكنبة – أمال متصل بينا ليه ؟ – ليه أزاى يعنى ؟!! شقتى أتكسرت بقولك !! – ( بص لى بقرف كأنه حايرجع ف وشى )مش بتقول مافيش حاجة أتسرقت منك .. خلاص كبر دماغك وبدا بالأنصراف .. نهار اسود الجدع بتاع نيويورك حايشمت فيا .. على جثتى ده يحصل ابدا – ( راجيا ) طب ماترفع البصمات ولا أى حاجة – بصمات ؟؟؟!!!! بصمات أيه يا أستاذ ؟ أنت فاكر نفسك فى نيويورك !!!!!!!!!! شارك هذا الموضوع:اضغط للمشاركة على تويتر (فتح في نافذة جديدة)انقر للمشاركة على فيسبوك (فتح في نافذة جديدة)
التعليقات مغلقة الان